Anissa Daoud, aita tunisiarra eta ama italiar-frantsesa, aktorea, idazlea, ekoizlea eta zuzendaria da.
Antzerkian, diziplinartekotasunean zentratzen diren eta eduki politiko nabarmena duten proiektuetan lan egiten du.
Zineman, besteak beste, Elyes Baccarren «Elle et Lui», Fadhel Jaziriren «Trente», Hatem Ali siriarraren «La nuit est Longue», Jilani Saadiren «Tenderness of the Wolf», Raja Amariren «Printemps Tunisien», Fares Naanaaren «Borders of Heaven», Lotfi Achourren «Burning Hope» (berak ere idatzi eta ekoitzi zuen) eta Kaouthar Ben Haniaren «Beauty and the Dogs» filmetan aritu da.
Aktore lanarekin batera, A.P.A. sortu zuen. (Artistes Producteurs Associés) eta, horrela, bere irudiko ekoizpen tresna bat sortu zuen, diziplina askotako artisten arteko topaketan oinarritua eta artelanen eta haien ekoizpen bitartekoen arteko koherentzia azpimarratzen duena. A.P.A.ren baitan, Parisen, Londresen, Tunisian... antzeztu diren hainbat antzerki proiektu idatzi eta ekoizten ditu.
Zinemagintzaren arloan, eta betiere A.P.A.n egiten duen lanaren barruan, «Burning Hope» ez ezik, «Law of the Lamb» — 2016ko Cannesko Zinemaldian ofizialki hautatua —, «The Rest is Work of Man» eta «The Eagles of Carthage» film laburrak ere ekoitzi ditu, 2016ko eta 2020ko Veneziako Zinemaldietan ofizialki hautatuak, hurrenez hurren. Produktore gisa, gaur egun fikziozko hiru film luze garatzen ari da bere produkzio-etxean, besteak beste, Lotfi Achourren fikziozko bigarren film luzea, «Red Path», eta sormenezko dokumental luze bat, «Blind Spot», baita zenbait film labur ere.
Zuzendari artistiko gisa hainbat kolaborazio egin ondoren, formatu laburreko hainbat dokumentalekin egin zuen debuta zuzendari gisa, feminismoa ardatz hartuta, eta gai hori oso gertutik ukitzen du.
2018an, Cannesko Zinemaldiko Errealizadoreen Hamabostaldiko «Tunisian Factory» filmerako «Best Day Ever» film laburra zuzendu zuen, Aboozar Amini zuzendari afganiarrarekin batera. «The Bath» da zuzendari gisa egin duen fikziozko bigarren film laburra.
Aktore eta ekoizle lanetan jarraitzen duen bitartean, gaur egun «Les Immortelles» fikziozko lehen film luzearen gidoia garatzen ari da.
